Мұқатаев Айдар Жаңбырбайұлының

№4 сайлау округі бойынша

Шу аудандық мәслихатының депутаты

Мұқатаев Айдар Жаңбырбайұлының

ӨМІРБАЯНЫ

Шу ауданы, Ленинское селосында (қазіргі Қонаев ауылы) 1965 жылдың 28 тамызында дүниеге келген.

1982 жылы Төле би ауылындағы М.Горький атындағы (қазіргі Е.Бекмаханов) орта мектепті үздік оқып, алтын медальмен бітірген. 1982 жылы Алматы мемлекеттік медициналық институтына түсіп, 1988 жылы осы аталған институтты «Емдеу ісі» мамандығы бойынша аяқтады.

1988-1989 жылдар аралығында Жамбыл қаласында қалалық ауруханада интернатурадан өтіп, хирург дәрігер мамандығына ие болған.

1989 – 1995 жылдар аралығында Шу аудандық орталық ауруханасының хирургия бөлімінде хирург дәрігері, 1995 жылдан 2003 жылға дейін хирургия бөлімінің меңгерушісі қызметін атқарған.

2003 жылдың 24 ақпанынан осы күнге дейін Шу аудандық орталық ауруханасының бас дәрігері қызметін атқарып келеді.

«Әлеуметтік гигиена және денсаулық сақтау ұйымдастырушысы» мамандығы бойынша бірінші санатты дәрігер.

2002 жылы «Ерен еңбегі үшін» медалімен, «Астанаға 10 жыл», 2009 жылы «Қазақстан Республикасы денсаулық сақтау ісінің үздігі» белгісімен, 2011 жылы «Тәуелсіздікке 20 жыл» медалімен марапатталған.

Үйленген, бір ұлы бар.

САЙЛАУАЛДЫ БАҒДАРЛАМАСЫ

 Қазақстанның Президенті Н.Ә.Назарбаевтың: «Ел Тәуелсіздігін баянды ету оған қол жеткізуден де қиын. Мемлекеттігіміздің тұғырын мызғымастай нығайта түсу үшін бізге әлі талай өткелі, күрделі өкпегі көп, бұралаң жолдардан өтуге тура келеді» деген сөздерін алға тарта отырып осындай жауапты сәтте бірлігімізді сақтап, еліміздің игілігі үшін аянбай тер төгуіміз керек. Аз уақыттың ішінде мемлекетіміз ірі тарихи жетістіктерді бағындырды. Сондықтан, еліміздегі ілгерілеушілікке халықтың қалаулылары – ҚР Парламент Мәжілісі мен барлық деңгейдегі мәслихаттары депутаттарының үлесі зор деп ойлаймын.

Белсенді өмірлік ұстанымым арқылы өз сайлаушыларымның қажеттіліктері мен құқықтарын қорғап, маған сенім артып дауыс беруге дайын азаматтардың мәселелерін шешу үшін мен аудандық мәслихаттың депутаттығына өз кандидатурамды ұсынып отырмын.

Егер депутаттыққа сайлансам, өз сайлаушыларыма бар білімімді, тәжірибемді және шығармашылық қабілетімді жұмсап, келесі мәселелердің шешілуіне ықпал етіп, олардың әл-ауқатын арттыруға уәде беремін:

–        №4   сайлау округі тұрғындарының құқықтарын қорғау;

–        Кемер дәрігерлік амбулаториясын күрделі жөндеуден өткізу;

–        Ауыл инфрақұрылымын дамытуға тікелей ықпал ету;

–        Қонаев ауылында абаттандыру және көгеріштендіру бағдарламасының іске асырылуына үлес қосу;

–        Кіші және орта бизнеске, кәсіпкерліктің дамуына қолдау көрсету;

–        Жастар арасындағы жұмыссыздық мәселесін шешу;

–        Жасөспірімдер мен жастар арасында салауатты өмір сүруге ықпал жасап, өсіп келе жатқан ұрпаққа саналы тәрбие беріп, ата-бабалардан қалған құндылықтарды сақтап, жалғастыра беруді қалыптастыру, мектеп, отбасы және қоғамдық бірлестіктердің күшін біріктіріп, оны жастар арасында өнегелі жыныстық тәрбиені насихаттауға, ерте жүктіліктің, тұрмыстық зорлық-зомбылықтың алдын алуға, қылмысқа, маскүнемдік және нашақорлыққа қарсы жұмылдыру;

–        Әйелдер мәселесін жүйелі шешу жолдарын кеңінен қарастыруда, сондай-ақ ана мен бала денсаулығын қорғауды мұқият орындауда күш-жігерімді аямаймын.

Денсаулық сақтау және білім беру салаларына қатысты заңдардың дұрыс орындалуын қадағалау өзімнің басты міндетім деп санаймын. Аудандық аурухананың бас дәрігері бола отырып, ауданның денсаулық сақтау саласын дамытып, аудан халқына медициналық қызмет көрсетудің деңгейін көтеру де менің міндетіме кіреді.

Медицинада айтулы еңбек тәжірибем бола тұра, халықтың проблемалары мен қажеттіліктерін біле отырып, сайлаушыларыма қандай да бір сұрақты шешер алдында қоғамдық қажеттіліктерді ескеретініме сөз беремін.

Депутаттыққа сайланған жағдайда, өз сайлау бағдарламамның жүзеге асуын қатаң сақтаймын.

ТЕЛЕФОН ҚАБЫЛДАУ

+7 (72638) 3-16-78

Баннеры